وہ عید والے دن قتل ہو گیا۔ مبین ملک اپنی سابق اداکارہ بیوی انجمن کے گھر بچوں سےعیدی ملنے گیا،قربانی کا فرض ادا کرکے 22 سالہ بیٹی کو ساتھ لیکر اس گھر آرہاتھا جہاں وہ انجمن سے خلع کے بعد اپنے بھائی زریں خان کے ساتھ رہ رہا تھا، اسے اسی گھر کے دروازے پر آٹھ گولیاں ماردی گئیں، ہارن کی آواز سن کر دروازہ کھولنے والا
چوکیدار بھی بھون دیا گیا، کار میں باپ کے ساتھ بیٹھی 22سالہ بیٹی امان شاید قاتلوں کا نشانہ نہ تھی، امان کو باپ کا جسم چیرکے آنے والی گولیاں لگیں، ڈاکٹر کہتے ہیں اس کی زندگی بچ گئی ہے،
1977 میں فلم لائن میں آنے والی انجمن کا تعلق ملتان کے مخصوص گھرانے سے ہے، مبین ملک سے پہلے وہ سندھ کے ایک وڈیرے کے نکاح میں رہی، اس وڈیرے سے انجمن کا ایک بیٹا ہے، جس کی ولدیت کے خانے میں مبین ملک نے اپنا نام لکھوا دیا تھا، مبین ملک سے انجمن کا ایک بیٹا اور ایک بیٹی ہے، مبین محکمہ انکم ٹیکس میں 21ویں گریڈ کا اعلی افسر ہونے کے باوجود انجمن کے خاوند کی حیثیت سے جانا جاتا تھا اور یہ تعارف اسے اچھا لگتا تھا، اسےسیاست کا بھی شوق رہا، پاکستان پیپلز پارٹی میں شامل ہونے کی بہت تگ و دو کی مگر منور انجم کا دوست ہونے کے باوجود دال نہ گلی۔۔ چھ سات مہینے پہلے پگاڑہ لیگ میں شامل ہوا، وہ لاہور میں پگاڑہ لیگ کا عہدیدار بھی تھا۔مبین ملک کے والد فوج میں تھے، انہیں ستارہ جرآت ملا تھا، یہ فیملی لاہور آنے سے پہلے گجرات کے علاقے کنجاہ میں رہتی تھی، کنجاہ وہی علاقہ ہے جس کے بارے میں کہاوت ہے---داتن پھلاں دی۔۔۔تے رن کنجاہ دی۔۔ اداکارہ آسیہ کے شادی کرکے ملک چھوڑ جانے کے بعد اس کی جگہ لی انجمن نے اور کئی برس وہ ملکہ بنی رہی، سلطان راہی نے سب سے زیادہ فلمیں انجمن کے ساتھ کیں۔
انجمن مبین ملک کا عشق تھی، شادی ہوتے ہی سازشیں شروع ہو گئیں، سونے کی چڑیا کے اڑ جانے سے انجمن کی فیملی بہت اپ سیٹ تھی، انجمن کے دونوں بھائی ناصر اور ارشد سر توڑ کوششیں کرتے رہے کہ باجی واپس گھر آ جائے، اس حوالے سے بہت پلان بنے، کئی بار انجمن ان کے شکنجے میں بھی آئی، انہی سازشوں کے باعث دونوں میاں بیوی کے مابین لڑائی جھگڑے طول پکڑنے لگے،بات عدالتوں تک بھی پہنچی،ایک مقام ایسا آیا جب مبین ملک نے انجمن کو طلاق دینے کاحتمی فیصلہ کر لیا۔ منور انجم ایک دن اسے میرے پاس لے آیا، ان دونوں کے ساتھ ایک تیسرا بھی تھا، جسے میں نہیں جانتا تھا، منور انجم نے مجھ سے کہا ، مبین انجمن کو طلاق دے رہا ہے، اسے سمجھاؤ، ایک بیٹا اور ایک بیٹی ہے اس کے بطن سے. کیا یہ بیٹی کو انجمن اور اسکی فیملی کے کلچر کے سائے میں جوان کرے گا؟ دلیل بہت مضبوط تھی، میں نے اس کی تائید کرتے ہوئے مبین ملک کی سرزنش بھی کی، مبین ملک کہنے لگا میں تو یہ شادی کرکے خود آدھا کنجر بن گیا ہوں، میں باہر بیٹھا ہوتا ہوں اور اندر کمرے میں اس کے ساتھ عاطف چوہدری اور شاہد میو جیسے بدمعاش رنگ رلیاں منا رہے ہوتے ہیں، یہ سب شادی سے پہلے بھی وہ کرتی تھی، میرے اس جواب پر منور انجم اور مبین ملک کے ساتھ آنے والا بھڑک اٹھا، آپ ایک کنجری کی وکالت کر رہے ہیں۔۔ آپ کو کیا پتہ کہ کنجری کی فطرت کیا ہوتی ہے؟ آپ کو یہ پتہ ہے کہ کنجری کبھی وفا نہیں کرتی؟ میں اس کے لہجے اور انداز گفتگو پر حیران ہوا، مبین، تمہارے ساتھ آنے والا یہ کون ہے، تم نے تعارف نہیں کرایا؟ مبین بولا، یہ ارشد ہے، انجمن کا بھائی۔ بعد میں ارشد کے گھر ہونے والی کئی نائٹ پارٹیوں میں جانے کا بھی اتفاق ہوا، جو اس کی بیوی منعقد کیا کرتی تھی،
چار پانچ سال پہلے کی بات ہے،ایک دن جان شیر خان میرے پاس آیا اور کہنے لگا کہ آج ایک رات ایک پارٹی ہے، تم میرے ساتھ چلو، وہ مجھے ڈیفنس کے ایک بنگلے میں لے گیا، شہر بھر کے تماش بین روساء وہاں نظر آئے، مہنگے داموں ناچنے والیاں محفل کو روشن کئے ہوئے تھیں، میرا یا جان شیر خان کا دوست یا جاننے والا کوئی نہ تھا، لہذا ہم میزبان سے علیک سلیک کرکےآخری کرسیوں جا بیٹھے، ابھی چند منٹ ہی گزرے تھے کہ ایک ایسا مہمان آیا کہ ساری محفل جھوم اٹھی، آنے والا مبین ملک تھا، میں نے سوچا، چلو ایک جاننے والا تو آیا ، لیکن مبین ملک نے ہماری جانب دیکھا تک بھی نہ، وہ درمیان میں رکھی گئی مہمان خصوصی کی کرسی پر براجمان ہوا، اس کے ارد گرد حسیناؤں کا جھمگھٹا تھا، دو لڑکیاں اس کے قدموں میں بیٹھ گئیں،مبین کے جوتے اور جرابیں اتاریں اور اس کے پاؤں کے مساج میں مصروف ہو گئیں، وہ واقعی راجہ اندر دکھائی دے رہا تھا، اس کی اتنی آؤ بھگت کیوں؟ میں نہ سمجھ سکا۔جن دنوں میں لندن میں ملازمت کر رہا تھا، مبین انجمن کے ساتھ ایک بار میرے آفس بھی آیا تھا، سرو قد انجمن ان دنوں پورے شباب پر تھی، ایک دن مبین نے مجھے اپنے گھر نائٹ پارٹی میں بلوایا، میں تو ایک سازش کا شکار ہو کر اس کے گھر نہ پہنچ سکا لیکن یہ جان کر حیران ہوا کہ اس دعوت میں بہت سارے گورے ارکان پارلیمنٹ بھی موجود تھے، میں نے سوچا،،انجمن کا شوہر ہو اور کاریگر نہ ہو، یہ کیسے ممکن ہو سکتا ہے؟ 16/اکتوبر 2013. مبین ملک کی کثیر الجہتی زندگی کا آخری دن ثابت ہوا، اس کے قتل کا فائدہ کس کس کو ہوا؟ کیاانجمن کو؟ جو کہتی ہے کہ خلع نہیں ہوا، انہوں نے رجوع کر لیا تھا۔ خلع نہ ہونے والی بات تو نہ جانے سچ ہے یا جھوٹ، ہاں رجوع والی بات غلط نہیں ہو سکتی۔۔ مبین ملک کے قتل کا فائدہ انجمن کی بہن گوری کو بھی تو ہو سکتا ہے؟ جس کا بڑی بہن کے ساتھ کوٹھی کا جھگڑا چل رہا ہے، انجمن کہتی ہے کہ36 جی والی کوٹھی جہاں گوری رہ رہی ہے، اس کی کمائی سے بنی تھی، لہذا گوری اس کوٹھی کو خالی کرے،مبین اس تنازعے میں انجمن کا ساتھ دے رہا تھا، مبین کے قتل کا فائدہ اس کے بھائی زرین خان کو بھی ہوگا، کیونکہ k-1 والی کوٹھی کے دونوں حصہ دار تھے، جائیداد کا جھگڑا تو مبین کا اپنے ماموؤں کے ساتھ بھی تھا۔پتہ نہیں مبین ملک کو کس نے مارا؟ کس نے مروایا؟ مجھے تو اس بات کا افسوس ہے کہ 22سالہ امان باپ کی نگہبانی سے محروم ہو گئی ہے۔
